ᐅᐃᕆᒪᓂᖅ ᓲᖑᔫᕗᖅ, ᐊᐅᒡᒐᓴᐅᖕᖏᑐᒥᒃ ᐋᖓᔮᓐᓇᑐᕐᑑᒪᒋᐊᖃᕐᓱᓂ, ᐃᒥᐊᓗᖃᑦᑕᓗᓂ ᐅᕙᓗᓐᓃᑦ ᐅᐃᕆᒪᐅᑎᖃᕐᓗᓂ ᓴᕝᕙᕐᓂᕐᒥᒃ.

ᐃᓅᓯᕐᓃᕕᑦ ᐱᒻᒪᕆᐅᓂᕐᐸᐅᓯᓲᖅ ᐱᓀᓗᑕᖃᕐᓂᒧᑦ ᐊᓂᕐᕋᒥ, ᐱᓇᓱᕝᕕᒥ ᐃᓕᓐᓂᐊᕕᒻᒥᓗ ᑐᕌᕐᑎᓯᓲᒍᑦᓱᓂ.

ᐊᑕᐅᓯᑐᐃᓐᓇᒥᒃ ᐱᑦᔪᑎᑕᖃᑦᔭᖏᑦᑐᖅ ᓱᒧᑦ ᐅᐃᕆᕙᓪᓕᐊᓲᒍᒻᒪᖔᑦᑕ. ᐃᓚᖏᑦ ᐃᓄᐃᑦ ᐃᑉᐱᓂᐊᒻᒪᕆᓲᑦ ᐊᓕᐊᓇᕐᑐᓂᒃ ᓄᓪᓚᖓᓇᕐᑐᓂᓪᓗᓃᑦ ᓱᖃᑦᓯᒍᒪᑦᓱᑎᒃ. ᐆᑦᕋᐅᑎᒋᓗᒋᑦ ᒪᑯᐊ:

• ᐃᒥᐊᓗᓗᑭᓗᓂ

• ᑐᐹᑭᖃᑦᑕᓗᓂ

• ᐋᖓᔮᓐᓇᑐᕐᑑᒪᓗᓂ ᐊᓯᖏᓐᓂᓗᓐᓃᑦ ᐋᖓᔮᒐᓱᐊᕈᑕᐅᒍᓐᓇᑐᓂᒃ

• ᓴᕝᕙᐃᖃᑦᑕᓗᓂ

• ᖃᕆᑕᐅᔭᒥᒃ ᐊᑐᖃᑦᑕᓗᓂ (ᐃᓚᐅᑎᓪᓗᒋᑦ ᓄᓕᐊᕐᑐᖑᐊᑦ)

• ᓄᓗᐊᕐᓂᖅ ᓇᓪᓕᓂᕐᓗ s

• ᓂᐅᕕᕋᓱᐊᕐᓂᖅ

ᑕᒪᓐᓇ ᓲᖑᔪᒥᒃ ᐊᑐᑎᒋᐊᓐᓛᕈᒥᓇᕐᑎᓯᒍᓐᓇᑐᖅ ᑖᒃᑯᓂᖓ ᐅᐃᕆᒪᐅᑎᓂᒃ.

ᐊᓕᐊᖕᖑᐊᓂᕐᒥᑦ ᐅᐃᕆᒪᓂᕐᒧᑦ

ᐃᓄᐃᑦ ᐊᒥᓱᑦ ᐊᑐᓗᑭᓲᑦ ᐅᐃᕆᒍᑕᐅᒍᓐᓇᑐᓂᒃ ᐋᖓᔮᒐᓱᐊᕈᑕᐅᒍᓐᓇᑐᓂᒃ ᐃᓚᐅᖃᑦᑕᓱᑎᓪᓗᓃᑦ ᐅᐃᕆᒍᑕᐅᒍᓐᓇᑐᓂ ᓱᓚᑳᓐᓂᓂ ᐱᓀᓗᑦᓯᕈᑎᒋᓗᐊᑦᔭᓇᒍ.

ᑭᓯᐊᓂᓕ, ᐃᓚᖏᓐᓄᑦ ᐃᓄᓐᓄᑦ ᓱᒃᑯᓇᕐᑐᓂᒃ ᑎᒥᒃᑯᑦ ᐃᓱᒪᒃᑯᓗ ᓱᕐᕃᒍᓐᓇᑐᓂᒃ ᐊᑑᑎᑎᑦᓯᒍᓐᓇᑐᑦ ᐱᐅᓯᕐᑖᐸᓪᓕᐊᒐᒥᒃ ᐊᑐᓗᑭᓐᓂᒥᒃ ᐱᓕᕐᐸᓕᐊᑐᐃᓐᓇᕋᒥᓪᓗ. ᑌᒪ ᐅᐃᕆᒪᓂᕐᒧᑦ ᑎᑭᐅᑎᓂᐊᓕᕋᒥᒃ. ᑕᒪᓐᓇ ᖃᕆᑕᕐᒥᒃ ᐊᓯᑦᔩᕙᓪᓕᐊᓯᓲᖅ.

ᑲᔪᓯᒍᑎᖃᕈᕕᑦ ᐋᖓᔮᒐᓱᐊᕈᑕᐅᒍᓐᓇᑐᓂᒃ ᐊᑐᕐᓂᒥᒃ ᐃᓚᐅᖃᑦᑕᕈᕕᓗᓐᓃᑦ ᑌᒣᓘᕐᑐᓂ, ᖃᕆᑌᑦ ᑎᒦᓪᓗ ᓱᖏᐅᑎᓲᒃ ᐋᖓᔮᓐᓇᑐᓂᒃ ᑭᖕᖒᒪᑦᓯᐸᓪᓕᐊᑐᐃᓐᓇᓕᕐᓱᑎᑦ, ᑌᒣᓘᕐᑐᓂᓪᓗᓃᑦ ᐃᓚᐅᓕᕐᐸᓕᐊᑐᐃᓐᓇᓕᕐᓱᑎᑦ ᑌᒫᑦᓭᓇᖅ ᐃᑉᐱᓂᐊᕈᒪᒧᑦ. ᐊᐅᒡᒐᓯᒪᒍᓐᓇᓚᐅᕋᓗᐊᕐᓱᒍ ᓯᕗᓪᓕᐹᒥ ᐊᐅᒡᒐᓴᐅᖕᖏᑐᒥᒃ ᑮᖕᖒᒪᒋᔭᕐᑖᓲᑦ ᐅᐃᕆᑦᓱᑎᓪᓗᓃᑦ.

ᓄᕐᕐᑲᕋᓱᐊᓕᕈᕕᑦ, ᑎᒥᒃᑯᑦ ᐃᓱᒪᒃᑯᓗᓐᓃᑦ ᖁᓄᓪᓕᕈᓐᓇᑐᖅ, ᑕᒣᓐᓂᓗᓐᓃᑦ ᐊᑑᑎᓗᓂ. ᑎᒥᐅᑉ ᖁᓂᓪᓕᕈᑎᖏᑦ ᐊᒥᓲᒍᓐᓇᑐᑦ ᐊᑦᔨᒌᒍᓐᓇᔭᒐᑎᓪᓗ ᖃᓄᐃᑦᑑᓂᖓ ᐋᖓᔮᒐᓱᐊᕈᑎᐅᑉ ᐃᑉᐱᒋᓗᒍ, ᑭᓯᐊᓂ ᐅᑯᓂᖓ

• ᐃᓱᐃᓪᓘᓗᑎᑦ

• ᓄᓪᓚᖓᒍᓐᓀᓗᑎᑦ

• ᐱᒍᒪᓂᕐᔪᐊᖃᕐᓗᑎᑦ ᐋᖓᔮᒐᓱᐊᕈᑕᐅᒍᓐᓇᑐᒥᒃ

ᑎᒥᐅᑉ ᖁᓄᓪᓕᓂᖓ ᐃᒥᐊᓗᒻᒥᑦ ᐱᓗᐊᕐᑐᒥᒃ ᐊᕐᓱᕈᓐᓇᑑᓲᒍᕗᖅ ᐃᓚᖓᓂ ᐃᓱᐃᓪᓕᑎᑕᐅᒋᐊᓪᓚᕈᓐᓇᕋᒥ ᖀᕐᓱᓂᕐᒧ ᑕᑯᓐᓈᒐᖃᕐᓂᒧᓪᓗ.

ᐊᒥᓱᓂᒃ ᑎᒥᐅᔪᖃᕐᐳᖅ ᐃᑲᔪᕐᓯᓲᓂᒃ ᐅᐃᕆᒪᓂᕐᒧᑦ ᒪᒥᒐᓱᐊᕐᑐᓂᒃ. ᐋᓐᓂᐊᓯᐅᕐᑎᒪᕇᑦ ᓯᕗᓪᓕᐸᐅᓗᓂ ᐅᐸᒐᑦᓴᓯᐊᒍᕗᖅ. ᐃᑲᔪᕐᓯᒪᒍᓐᓇᓚᖓᔪᖅ ᐊᔪᖀᒋᐊᖃᑦᑕᓗᓂᓗ, ᐅᓐᓂᑑᑎᖃᕈᓐᓇᓱᓂᓗ ᐱᒍᓐᓇᐅᑎᓕᓐᓂᒃ ᐅᐃᕆᒪᓂᕐᒧᑦ ᐱᒍᑦᔭᐅᕕᓐᓂᒃ ᑌᒣᑎᒍᑦ ᑲᓇᑕᓕᒫᒥ ᓄᓇᓕᐅᓪᓗ ᐃᓗᐊᓂ.

ᐊᑐᐊᕐᓯᒋᐊᓪᓚᓗᑎᑦ ᑐᑭᓯᒪᐅᑎᑦᓴᓂᒃ ᐅᐃᕆᒪᓂᐅᑉ ᒥᑦᓵᓄᑦ:

ᐅᐃᕆᒪᓇᕐᑐᓂᑦ ᒪᒥᓭᓂᖅ ᑕᑯᓐᓇᑕᑐᐊᖃᓪᓚᕆᓲᖅ ᑖᑦᓱᒥᖓᑐᐊᖅ ᐃᓄᒻᒥᒃ ᐱᓇᓱᐊᕐᕕᒋᔭᒥᓂᒃ ᑭᖕᖒᒪᒋᔭᖏᓐᓂᓗ. ᐅᖄᑎᑕᐅᓃᑦ ᐄᕐᕐᑲᒉᓪᓗ ᐅᓐᓂᑑᑎᒋᔭᐅᔪᑦ ᒪᒥᓭᓂᕐᒧᑦ. ᐅᖄᑎᑕᐅᓂᒃᑯᑦ ᒪᒥᓭᓃᑦ ᐃᑲᔪᕐᓯᓂᖃᓲᒍᓂᕐᐹᑦ ᐅᐃᕆᒪᓂᕐᒥᒃ ᒪᒥᓭᓂᕐᒧᑦ ᐅᑯᐊᒍᕗᑦ ᐃᓚᖏᑦ:

• ᐃᓱᒪᐅᑉ ᐱᐅᓯᖓᓂᒃ ᒪᒥᓭᒍᑎᖃᕐᓂᖅ (CBT)

ᐃᓱᒪᐅᑉ ᐱᐅᓯᖓᓂᒃ ᒪᒥᓭᒍᑎᖃᕐᓂᖅ ᑐᖕᖓᕕᖃᕐᐳᖅ ᐃᓱᒪᒋᔭᕐᐱᑦ, ᐃᑉᐱᓂᐊᒋᔭᕐᐱᑦ, ᑎᒥᑉᐱᑦ ᐃᑉᐱᓂᐊᕐᓂᖓᑕ ᐱᓂᐊᕐᓂᐱᓪᓗ ᐱᑐᑦᓯᒪᐅᑎᓂᖏᓐᓂᒃ, ᐃᓱᐃᑦᑐᐃᓗ ᐃᓱᒣᑦ ᐃᑉᐱᓂᐊᕐᓃᓗ ᒥᑭᒋᐊᕐᑎᓯᒍᓐᓇᓂᖏᓐᓂᒃ ᐃᓕᓐᓂᒃ ᐃᓱᐊᖕᖏᑐᒥ ᑫᕕᑐᐃᓐᓇᓂᕐᒥ.

ᐃᓱᒪᐅᑉ ᐱᐅᓯᖓᓂᒃ ᒪᒥᓭᒍᑎᖃᕐᓂᖅ ᐃᑲᔪᕋᓱᐊᓲᒍᕗᖅ ᐅᖁᒣᓗᐊᕐᑐᓂᒃ ᐱᓀᓗᑕᖃᓕᕐᑎᓗᑎᑦ ᐃᓱᐊᕐᓂᓴᒨᕐᑎᓯᒐᓱᐊᕐᓱᓂ ᒥᑭᓈᕐᑎᓱᒋᑦ ᓯᖁᒥᖃᑦᑕᓱᒋᑦ.

ᑕᑯᑎᑦᓯᓲᑦ ᖃᓄᖅ ᐊᓯᑦᔩᒋᐊᕈᓐᓇᒪᖔᕐᐱᑦ ᑕᒪᒃᑯᓇᖕᖓᑦ ᐃᓱᐊᖕᖏᑐᓂᒃ ᐱᐅᓯᖃᕐᓂᒥᑦ ᐃᑉᐱᓂᐊᕆᔭᕐᓃᕕᑦ ᐃᑯᓪᓚᐅᒥᑎᑦᓯᒐᓱᐊᕐᓂᒧᑦ. ᐊᓯᒥᑎᑐᑦ ᐅᖄᑎᑦᓯᓂᒃᑯᑦ ᒪᒥᓭᓂᕐᑎᑐᑦ, ᐃᓱᒪᐅᑉ ᐱᐅᓯᖓᓂᒃ ᒪᒥᓭᒍᑎᖃᕐᓂᖅ ᐅᓪᓗᒥ ᐱᓀᓗᑕᐅᔪᓂᒃ ᓵᖕᖓᓯᓲᖅ ᑭᖑᓂᑦᑎᓂ ᐊᑑᑎᔪᕕᓂᕐᓂᒃ ᑕᑯᓐᓇᖏᖔᕐᓱᓂ.

ᕿᓂᓲᖅ ᐃᓱᒪᑉᐱᑦ ᐃᓱᕐᕆᓯᐅᒥᒍᑎᒋᒍᓐᓇᑕᖏᓐᓂᒃ ᖃᐅᑕᒫᑦ.

ᑲᑦᓱᙰᓕᑎᑦᓯᒐᓱᐊᕐᓂᒧᑦ ᒪᒥᓭᓂᖅ (MET)

ᑲᑦᓱᙰᓕᑎᑦᓯᒐᓱᐊᕐᓂᒧᑦ ᒪᒥᓭᓂᖅ ᒪᒥᓭᒍᓯᐅᕗᖅ ᐃᑲᔪᕐᓯᒍᓐᓇᓱᓂ ᐊᓂᒍᐃᒐᓱᐊᕐᓂᒧᑦ ᐊᑦᔨᒌᖕᖏᑐᓂᒃ ᐃᓱᒪᓕᐅᕐᓂᒥᒃ ᐃᓚᐅᓂᕐᒧᑦ ᒪᒥᓴᕐᓂᒥ ᓄᕐᕐᑲᓂᕐᒥᓗ ᐋᖓᔮᓐᓇᑐᓂᒃ. ᑐᕌᒐᖃᓲᖅ ᐊᒧᓯᒐᓱᐊᕐᓂᒥᒃ ᐃᒻᒥᓂᒃ ᑲᑦᓱᙰᓕᑎᕆᓂᕐᒧᑦ ᐅᖃᐅᑦᔪᐃᓂᕐᓂᒃ. ᑌᒪ ᐊᓯᑦᔨᒋᐊᕈᒪᓂᕐᒧᑦ ᐸᕐᓇᐸᓪᓕᐊᓯᓂᐊᓕᕋᒥ ᑐᖕᖓᕕᖃᕐᓱᓂ ᑐᓂᓂᕐᒥᒃ ᓯᕗᒧᐊᒋᐊᕐᓂᒧᑦ ᕿᓂᓕᕐᓗᓂᓗ ᐱᓀᓗᑕᐅᑉ ᐋᕐᕐᑭᒍᑎᑦᓴᖓᓂᒃ.

ᒪᒥᓭᓂᖅ ᐱᒋᐊᕐᕕᓕᐅᑎᖃᕙᓪᓗᓲᖅ ᑲᔪᖏᕐᓭᓱᓂ ᐃᓕᓐᓂᒃ ᐃᓱᒪᒐᓱᐊᕐᓗᑎᑦ ᖃᓄᖅ ᐊᓯᑦᔨᒍᒪᒻᒪᖔᕐᐱᑦ. ᐱᒻᒪᕆᐅᕗᖅ ᒪᒥᓭᔩᑦ ᐃᕐᕐᑲᑐᐃᓂᕐᑕᖃᕆᐊᖃᖕᖏᒪᑦ ᐃᑲᔪᕐᑐᓂᖃᕐᓗᓂᓗ ᓈᓚᒍᓐᓇᕆᐊᖃᕐᓱᓂ. ᐅᑉᐱᕆᔭᖃᕆᐊᖃᕐᑐᑎᑦ ᒍᒪᒋᐊᒥᒃ - ᒍᓐᓇᓂᕐᒥᓗ - ᐊᓂᒍᐃᒍᓐᓇᓂᕐᒥᒃ ᐅᐃᕆᒪᒍᑎᓐᓃᕕᑦ ᐃᓅᓰᓪᓗ ᐱᐅᓯᐅᒥᓚᕿᒍᓐᓇᓱᓂ.

ᐅᐃᕆᒪᓂᕐᒧᑦ ᒪᒥᓭᔨ ᐅᖄᒐᔭᕐᑐᖅ ᐅᑯᓂᖓ: :

• ᖃᓄᖅ ᐃᓅᓯᕐᓃᕕᑦ ᑕᑯᓐᓇᒪᖔᕐᐱᑦ ᓯᕗᓂᕐᒧᑦ

• ᓱᓇᓂᒃ ᐊᕝᕕᐊᓗᑕᖃᕐᑐᕆᒻᒪᖔᕐᐱᑦ ᐱᓇᓱᐊᓕᕐᑎᓗᑎᑦ ᐊᓯᑦᔨᒋᐊᕐᓂᒧᑦ

• ᓱᓇᓄᑦ ᐃᑲᔪᕐᓯᔭᐅᓚᖓᔪᕆᒻᒪᖔᕐᐱᑦ ᐊᓂᒍᐃᒐᓱᐊᕐᑎᓗᑎᑦ ᐊᕝᕕᐊᓗᑕᓂᒃ

ᐅᐃᕆᒪᓂᕐᒧᑦ ᒪᒥᓭᔨ ᐃᑲᔪᕈᓐᓇᒥᔪᖅ ᑐᑭᓯᑎᑦᓯᓗᓂ ᐋᖓᔮᓐᓇᑐᒥᒃ ᓄᕐᕐᑲᓂᖅ ᐱᐅᓯᕐᒥᓗᓐᓃᑦ ᓄᕐᕐᑲᐅᔨᓂᖅ

ᐱᒻᒪᕆᐅᕗᖅ ᐃᓚᑉᐱᑦ ᐃᓚᓐᓈᐱᓪᓗ ᐃᓚᐅᑎᒋᐊᖃᕐᓂᖏᑦ ᓴᐳᑦᔨᓯᒪᓗᑎᒃ ᐊᓂᒍᐃᒐᓱᐊᕐᑎᓗᑎᒃ ᐅᐃᕆᒪᓂᕐᒥᒃ.

ᐅᐃᕆᓯᒪᐅᑎᑖᕈᐊᕐᓂᓴᐅᒍᓐᓇᐳᑎᑦ ᐃᒣᑦᑐᒦᒍᕕᑦ:

• ᐃᓚᑎᑦ ᐅᐃᕆᒪᓇᕐᑐᓂᒃ ᐱᓐᓀᓗᑕᖃᕐᐸᑕ

• ᐊᕐᓱᕉᓯᖓᖃᑦᑕᓂᕈᕕᑦ ᐱᓗᑲᑦᑕᐅᓯᒪᒍᕕᓪᓗᓃᑦ ᐱᕈᑦᓴᑎᓪᓗᑎᑦ

• ᐃᓱᒪᒃᑯᑦ ᐃᓗᓯᕐᓱᓯᐊᖕᖏᑯᕕᑦ

• ᐱᓇᓱᖕᖏᓂᕐᒥᒃ ᑮᓇᐅᔦᓪᓗᓂᕐᒥᓗ ᐃᓱᒫᓗᒍᑎᖃᕈᕕᑦ

• ᐃᓅᖃᑎᖃᕐᓂᑯᑦ ᐁᑉᐸᖃᕐᓂᑯᓪᓗᓃᑦ ᐱᓀᓗᑕᖃᕈᕕᑦ

ᐅᐃᕆᒪᓂᖅ ᐱᒋᐊᕐᐸᓕᐊᒡᒐᔪᕐᑐᑦ ᓇᐅᑐᐃᓐᓇᖅ ᓵᑦᓯᒐᓱᐊᓕᕐᒪᑦ ᐳᐃᒍᕋᓗᐊᕐᓱᓂᓗᓐᓃᑦ ᑕᒪᒃᑯᓂᖓ ᐅᖁᒣᑦᑐᓂᒃ ᐱᑦᔪᑎᓂᒃ.

ᑕᑯᓐᓇᕋᑦᓴᒧᑦ ᐱᑐᒍᑎᒃ:

ᖃᓄᖅ ᐅᐃᕆᒪᓂᖅ ᐊᓯᑦᔩᓲᒍᒻᒪᖔᑦ ᖃᕆᑕᕐᓃᕕᑦ.

(ᐊᑦᔨᓕᐊᒍᓯᒪᔪᑦ ᐅᕙᖕᖓᑦ: http://www.nhs.uk/conditions/Addictions/Pages/Introduction.aspx)

ᐃᒥᐊᓗᒃ

Oxford ᐅᓕᕐᓀᓯᒍᑎᖏᓐᓂ ᐃᒫᒃ ᑐᑭᖃᕐᑎᑕᐅᔪᖅ:

“ᑕᐅᑦᑐᖃᑦᔭᒐᓂ ᐃᑯᐊᓪᓚᕈᓐᓇᓱᓂ ᐃᒪᕐᑎᑐᑦ ᐱᐅᓯᓕᒃ ᓴᓇᔭᐅᓲᖅ ᐃᒍᓇᕐᓯᐊᕆᑦᓱᒋᑦ ᒪᒪᕐᓴᐅᑏᑦ (ᐱᑕᑦᓭ) ᐋᖓᔮᒍᑕᐅᒍᓐᓇᑐᓕᐊᒍᑦᓱᓂ ᕚᐃᓂᐅᓗᓂ, ᐱᐊ ᐊᒻᒪᓗ ᐃᒥᐊᓗᒃ, ᐊᓯᖏᓪᓗ ᐃᒥᐊᓗᐃᑦ, ᓂᐅᕕᐊᑦᓴᖁᑎᒋᔭᐅᓲᒍᑦᓱᓂ ᐅᕐᓱᐊᓘᒍᓐᓇᓱᓂᓗ.”

ᐊᖏᓂᕆᔭᐅᒡᒐᔪᕐᑐᑦ ᐃᒥᐊᓗᒻᒧᑦ ᐃᒣᓪᓗᐊᐳᑦ:

12 ounces ᐱᐊᑐᐃᓐᓇᖅ

9-9 ounces of ᐃᒻᒧᖃᕐᓱᑎᒃ ᐃᒥᐊᓗᐃᑦ (ᑕᑯᑦᓴᐅᑎᑕᐅᔪᑦ12 oz-ᒥ ᐃᒥᕈᑎᒥ)

5 ounces ᒦᓲᖅ ᕙᐃᓂᖅ

1.5 ounce ᐊᑕᐅᓯᕕᓪᓗ ᓂᐅᕐᑕᐅᓲᖅ of 80-proof-ᒥᒃ ᐃᒥᐊᓗᒻᒥᒃ

40% ᐃᒥᐊᓗᒃ

ᐳᓯᐊᓐᑎᖓ ᐃᒥᐊᓗᑐᐃᓐᓇᐅᑉ ᐅᖃᕐᑕᐅᔪᖅ ᑕᒫᓂ ᐊᖏᓂᖓᒍᑦ ᓱᓇᐅᓂᖓᓗ ᐃᒥᐊᓘᑉ ᒪᓕᑦᓱᒍ ᐊᑦᔨᒌᑦᔭᒐᓂ

ᑳᓂᐱᔅ ᐅᔭᕋᖅ

ᓇᓗᓀᕐᑕᐅᒍᓯᖓ:

“ᐸᓂᕐᑐᐃᑦ ᐅᖃᐅᔦᑦ ᐱᕈᕐᓯᐊᖏᑦᑕᓗ ᓄᕗᖏᑦ Cannabis sativa ᐱᔪᑦ ᐅᕝᕙᓗᓐᓃᑦ Cannabis indica-ᒥᑦ ᐱᕈᕐᑐᒥᑦ. ᑳᓂᐱᔅ ᐃᓗᓕᖃᕐᐳᖅ ᐆᒪᔪᓂᒃ ᓴᕕᕋᔭᐅᔭᓂᒃ cannabinoids ᒍᓂᕋᕐᑕᐅᔪᓂᒃ ᐄᕐᕐᑲᒐᕐᑐᓯᒪᔫᔮᕐᑎᓯᔪᓂᒃ ᑎᒥᓕᒫᒥᒃ, ᐃᑉᐱᓂᐊᕈᑎᖏᑦ ᐃᓚᐅᑎᓪᓗᒋᑦ ᑎᒥᐅᓪᓗ ᓴᐴᓗᑕᖏᓐᓂᒃ.”

ᑳᓂᐱᔅ ᐃᓚᑦᓴᔭᖃᕐᑎᑕᐅᓲᖅ 120 ᐅᖓᑕᓄᑦ cannabinoids ᒍᓂᕋᕐᑕᐅᔪᓂᒃ. ᖃᐅᔨᒪᔪᒻᒪᕇᑦ ᓱᓕ ᖃᐅᔨᒪᑦᓯᐊᔭᖏᑦᑐᑦ ᓱᓲᒍᒻᒪᖔᑕ ᐊᑐᓂᑦ cannabinoid, ᑭᓯᐊᓂ ᑐᑭᓯᒪᑦᓯᐊᑐᕆᔪᑦ ᒪᕐᕉᓂᒃ ᑌᔭᐅᒍᓯᓖᓐᓂᒃ cannabidiol (CBD) ᐊᒻᒪᓗ tetrahydrocannabinol (THC).

ᐊᑐᓂᑦ ᓱᕐᕃᒍᓯᓖᑦ ᐊᑐᕐᑕᐅᒍᓯᖃᕐᓱᑎᓪᓗ:

• CBD. ᑖᓐᓇ cannabinoid-ᒍᑦᓱᓂ ᐃᑉᐱᓂᐊᕈᑏᑦ ᐊᐅᓚᒍᓯᖏᓐᓂᒃ ᐊᓯᑦᔩᓲᖅ, ᒐᓗᐊᕐᓱᓂ ᐋᖓᔮᓕᕐᑎᓯᓲᒍᑦᔭᖏᑦᑐᖅ ᐃᑉᐱᓂᐊᓕᕐᑎᓯᓲᒍᑦᔭᒐᓂᓗ. ᐊᑐᕐᑕᐅᓲᖅ ᐃᑲᔪᕐᓯᒍᑕᐅᒐᓱᐊᕐᓱᓂ ᐃᒻᒪᓯᓐᓇᓂᒃ ᐋᓐᓂᐊᔪᒥᓪᓗ. ᒥᕆᐊᖕᖑᓱᑦᑐᒥᒃ ᐃᑯᓪᓚᐅᒥᑎᑦᓯᒍᓐᓇᒥᔪᖅ, ᓂᐊᖁᖕᖑᒪᕆᑦᑐᒥᒃ, ᖀᕐᓱᓂᕐᒥᒃ ᖁᐊᕐᓵᖓᓂᕐᒥᓗ. (Epidiolex ᓯᕗᓪᓕᐸᐅᑦᓱᓂ ᑕᓐᓇᑑᑦᓱᓂᓗ ᐄᔭᒐᐅᑦᓱᓂ CBD-ᒥᒃ ᐃᓚᓕᒃ ᐊᖏᕐᑕᐅᓯᒪᑦᓱᓂᓗ ᓂᕿᓂᒃ ᐄᔭᒐᕐᓂᓗ ᐊᐅᓚᑦᓯᔨᓄᑦ (Food and Drug Administration, or FDA). ᑖᓐᓇ ᐄᔭᒐᖅ ᖀᕐᓱᓃᑦ ᐃᓚᖏᓐᓂᒃ ᐋᕐᕐᑭᓯᒪᑎᑦᓯᒐᓱᐊᕈᑎᐅᓲᖅ.) ᖃᐅᔨᓴᕐᑏᑦ ᐅᓪᓗᒥᒧᑦ ᓱᓕ ᑐᑭᓯᒐᓱᐊᕐᑐᑦ ᐊᑑᑎᖃᑦᓯᐊᕋᓗᐊᕐᒪᖔᑕ CBD’s ᐋᓐᓂᐊᓯᐅᑎᒋᔭᐅᒍᑎᒃ.

• THC. ᑖᓐᓇᓗᐊᖕᖑᐊᑕᒐ cannabis ᐃᓗᓕᖓ ᐃᑉᐱᓂᐊᕈᑏᑦ ᐊᐅᓚᒍᓯᖏᓐᓂᒃ ᐊᓯᑦᔩᓲᒍᑦᓱᓂ. THC-ᒧᑦ ᐃᑉᐱᓂᐊᕐᑎᑕᐅᓚᕿᓲᑦ cannabis-ᒥᒃ ᐊᑐᕐᑐᑦ.

(ᐊᑦᔨᓕᐊᒍᓯᒪᔪᑦ ᐅᕙᖕᖓᑦ: https://www.healthline.com/health/what-is-cannabis#Whats-the-definition-of-cannabis?)

Cannabis ᐱᖁᔭᑎᒍᑦ ᐊᖏᕐᑕᐅᓯᒪᓕᕐᑐᖅ ᑲᓇᑕᒥ 2018-ᒥᓂᑦ. ᒪᐅᓇ ᓇᕐᓂᓗᒍ ᑐᑭᓯᒋᐊᓪᓚᒍᑎᑦᓭᑦ ᓄᐃᓂᐊᕐᒪᑕ.

ᐋᖓᔮᓐᓇᑐᕐᑑᒪᓂᖅ ᐱᐊᕋᑦᓴᖃᕐᓗᓂ? ᐱᐊᕋᑦᓴᓖᑦ ᐊᓐᓀᑦ ᐋᖓᔮᓐᓇᑐᒥᒃ ᐊᑐᓲᒍᒍᑎᒃ ᐊᑦᑕᓇᕐᑐᒨᕐᓯᑐᐃᓐᓇᕆᐊᓖᑦ ᐃᓅᓕᕋᑕᖕᖏᑑᑉ ᐱᐊᕋᐅᑉ ᖃᕆᑕᖓᑕ ᐱᕈᕐᐸᓕᐊᓂᖓ ᐊᓯᑦᔨᑐᐃᓐᓇᕆᐊᖃᕐᒪᑦ. ᑌᒣᔨᐊᖃᕈᓂ ᐱᐊᕋᖅ ᐱᓀᓗᑦᓯᓯᒪᑐᐃᓐᓇᕆᐊᓕᒃ ᓈᓚᒍᓐᓇᓂᕐᒥᒃ, ᐊᐅᓚᔨᒍᓐᓇᓂᕐᒥᒃ ᐱᓀᓗᑕᕐᓂᓗ ᐋᕐᖀᓱᐃᒍᓐᓇᓂᕐᒥᒃ.

ᐋᖓᔮᓐᓇᑐᖅ ᐃᓕᓴᕐᕕ;ᓗ

ᐃᓕᓵᑦ ᐋᖓᔮᓐᓇᑐᕐᑐᓲᑦ ᐳᒃᑭᓂᕐᓴᐅᒐᔪᓲᑦ ᐃᓕᓐᓂᐊᓂᖏᑦ ᐃᓕᓴᕐᓂᒥᓪᓗ ᓄᕐᙯᓇᕈᐊᕐᓂᓴᐅᑦᓱᑎᒃ ᐃᓕᓴᖃᑎᒥᓂᑦ ᐋᖓᔮᓐᓇᑐᕐᑐᔫᒍᖕᖏᑐᓂᑦ. ᐋᖓᔮᓐᓇᑑᑉ ᓱᕐᕃᖃᑦᑕᓂᖓ ᓈᓚᒍᓐᓇᓂᕐᒥᒃ, ᐊᐅᓚᔨᒍᓐᓇᓂᕐᒥᒃ ᐃᓕᑦᓯᕙᓪᓕᐊᒍᓐᓇᓂᕐᒥᓗ ᐅᓪᓗᓂ ᐊᒥᓱᑐᕈᓐᓇᑐᖅ ᐱᓇᓱᐊᕈᓯᕐᓂᓗᓐᓃᑦ ᐊᒥᓱᓂ. ᑕᒪᒃᑯᐊ ᓱᕐᕋᑕᐅᒪᓃᑦ ᐃᓱᐊᖕᖏᑐᒧᑦ ᓱᕐᕃᒍᓐᓇᑐᑦ ᐃᓕᑦᓯᕙᓪᓕᐊᓂᕐᒥᒃ ᑲᑦᓱᙰᓐᓂᒥᓪᓗ. ᐊᓪᓛᑦ ᐋᖓᔮᓐᓇᑐᕐᑐᓗᑭᑦᑐᑦ ᐊᑯᓂ ᐃᓅᓯᕐᒥᓂᒃ ᓈᒻᒪᓴᖕᖏᓂᕐᓴᐅᓲᑦ ᐱᓀᓗᑕᖃᕐᕕᖃᕈᐊᕐᓂᓴᐅᑦᓱᑎᓪᓗ ᐃᓚᓐᓈᒥᓂᒃ ᐃᓚᒥᓂᓪᓗ ᑕᑯᓐᓇᓗᒋᑦ ᐋᖓᔮᓐᓇᑐᕐᑑᒪᓲᒍᖕᖏᑐᑦ.

ᐋᖓᔮᓐᓇᑐᖅ ᐱᕈᕐᓯᐊᖅ ᐅᐃᕆᒍᑕᐅᒍᓐᓇᐸ?

ᔪᖅ, ᐋᖓᔮᓐᓇᑐᖅ marijuana ᐅᐃᕆᒍᑕᐅᒍᓐᓇᑐᖅ. Marijuana-ᒥᒃ ᐊᑐᓲᖅ ᐱᒋᐊᓕᕐᕐᑭᑖᑐᐃᓐᓇᕈᒪᒍᓐᓇᑐᖅ Marijuana-ᒥᒃ ᐃᑉᐱᓂᐊᕐᓇᓂᖓᓂᒃ ᐃᑉᐱᓂᐊᕈᒪᒐᒥ. ᐊᑐᓗᑭᑦᑕᐅᒍᓂ ᐅᐃᕆᒍᑕᐅᒍᓐᓇᑐᖅ - ᑕᒪᓐᓇ ᑐᑭᓕᒃ ᑌᓐᓇ ᐃᓄᒃ ᑕᒪᑐᒥᖓ ᐊᑑᑎᒍᓂ ᐊᐅᒡᒉᒍᓐᓇᔭᖏᑦᑐᖅ ᐋᖓᔮᓐᓇᑐᕐᑑᒪᓂᕐᒥᓂᒃ ᓄᕐᕐᑲᕈᓐᓇᖏᕈᓐᓇᓱᓂᓗ ᒍᒪᓕᕋᓗᐊᕐᓱᓂ.

Cannabis (ᑳᓂᐱᔅ ᐃᓱᒪᐅᓪᓗ ᑲᔪᓯᑦᓯᐊᕈᓐᓇᖏᕐᑕᓂᖓ

ᐋᖓᔮᒐᓱᐊᕈᑎᓕᒫᑦ ᓱᕐᕃᓲᒍᒻᒪᑕ ᖃᕆᑕᕐᒥᒃ ᐃᑉᐱᓂᐊᕈᑎᓂᓪᓗ, ᖃᐅᔨᓴᕈᑕᐅᓯᒪᔪᑦ ᓄᐃᑦᓯᓯᒪᕗᑦ ᐅᕕᒃᑲᐅᑉ ᖃᕆᑕᖓᑕ ᓱᕐᕋᑕᐅᒍᓐᓇᓂᖓᓂᒃ ᑳᓂᐱᔅᒥᒃ ᐊᑐᖃᑦᑕᕈᓂ.

ᒪᐅᓇ ᓇᕐᓂᓗᒍ ᑐᑭᓯᒋᐊᓪᓚᒍᑎᑦᓭᑦ ᓄᐃᓂᐊᕐᒪᑕ.

“ᖁᐊᕐᓵᓇᕐᑐᑰᕐᓯᒪᓂᖅ ᐃᒣᑦᑐᓚᕆᐅᕗᖅ: ᐱᑐᑦᓯᒪᕕᖃᕈᓐᓇᖏᕐᓂᖅ, ᐊᕐᓱᕉᓴᕐᕐᑲᔭᑦᓯᐊᖏᓐᓂᖅ, ᐃᑉᐱᓂᐊᕆᔭᒥᓂᒃ ᐃᑉᐱᓂᐊᕈᑎᖃᕈᓐᓇᖏᓐᓂᖅ, ᐃᑉᐱᓂᐊᕈᑎᐊᐱᖏᓪᓗ ᐊᕐᓱᕈᓗᐊᓕᕐᓱᑎᒃ.” Dr. Nicole LePera ᐅᖃᕐᓯᒪᔪᖅ.

“ᖁᐊᕐᓵᓇᕐᑐᑰᕐᓯᒪᓂᖅ ᐱᓂᐊᕐᓂᒧᑦ ᐊᑦᑐᑕᐅᒪᓂᑦᑎᓄᑦ ᑌᒣᓚᕿᓲᒍᑦᔭᖏᑦᑐᖅ, ᑭᓯᐊᓂ ᐃᓗᒥᐅᑦᓯᓯᒪᓂᑦᑎᓄᑦ ᐊᑦᑐᑕᐅᒍᑎᕕᓂᑦᑎᓂᒃ ᑌᒣᓚᕿᓲᖅ.” Dr. Gabor Maté ᐅᖃᕐᓯᒪᔪᖅ.

ᒪᐅᓇ ᓇᕐᓂᓗᒍ ᑐᑭᓯᒋᐊᓪᓚᒍᑎᑦᓭᑦ ᓄᐃᓂᐊᕐᒪᑕ:

• ᐃᓕᖓᔪᑦ ᓄᓇᖃᕐᖄᑐᕕᓃᑦ ᐃᓱᒪᒋᓲᖏᓐᓄᑦ ᖁᐊᕐᓵᓇᕐᑐᑰᕐᓯᒪᓂᕐᒧᑦ ᐊᒻᒪᓗ ᓱᒃᑯᓇᕐᑐᑑᒪᓂᕐᒧᑦ.

• ᐃᓕᖓᔪᑦ ᖁᐊᕐᓵᓇᕐᑐᑰᕐᓯᒪᓂᕐᒧᑦ ᐊᒻᒪᓗ ᐊᕐᓵᑕᐅᓯᒪᓂᕐᓄᑦ.

ᑲᒃᑲᓛᑦ ᖁᐊᕐᓵᓇᕐᑐᑰᕐᓯᒪᓂᕐᓗ

ᐊᕐᕌᒍᓂ ᐊᓂᒍᕐᑐᓂ ᑐᑭᓯᒪᓕᕐᕐᑯᒍᑦ ᖃᓄᖅ ᓱᕐᕋᑕᐅᓲᒍᒻᒪᖔᑕ ᑲᒃᑲᓛᑦ ᖃᓄᐃᖕᖏᓯᐊᕆᐊᖃᕐᓂᖏᑦ ᐱᐊᕋᐅᓂᕐᒥᓂ ᐃᓅᓯᓕᒫᒥᓂᓗ.

ᑲᒃᑲᓛᒍᓂᖅ ᐱᒻᒪᕆᐅᓘᕗᖅ ᐃᓅᑉ ᐃᓅᓯᖓᓂ, ᖃᕆᑕᖅ ᐱᕈᕐᐸᓕᐊᔪᖅ ᑲᒃᑲᓛᓪᓗ ᐃᓕᑦᓯᕙᓪᓕᐊᕉᑕᕆᔪᑦ ᐱᒍᓐᓇᕆᐊᖃᓛᕐᑕᒥᓂᒃ ᖃᓄᐃᖕᖏᓯᐊᕐᓗᑎᒃ ᐊᓕᐊᓪᓗᑎᒃ ᐃᓄᒻᒪᕆᖕᖏᓂᐊᕈᑎᒃ.

ᖃᐅᔨᒪᕗᒍᑦ ᐊᒥᓱᑦ ᐱᓂᐊᕐᓃᑦ ᓄᓇᓕᑦᑎᓂ ᐅᓪᓗᒥ ᐊᕐᓱᕈᓐᓇᕈᓐᓇᑐᑦ ᑲᒃᑲᓛᓄᑦ. ᑕᑯᓐᓇᖃᑦᑕᓱᑎᒃ ᐃᓚᒌᑎᒍᑦ ᐱᒋᐊᖃᑦᑕᐅᑎᓂᕐᒥᒃ, ᓄᓕᐊᕐᓂᑯᑦ ᐊᑐᕐᓂᓗᑦᑕᐅᓂᕐᒥᒃ, ᑎᒥᒃᑯᑦ ᐋᓐᓂᑎᕐᑕᐅᓂᕐᒥᒃ ᐱᐊᕋᐅᓪᓗ ᑲᒪᒋᔭᐅᑦᓯᐊᖏᓐᓂᖓᓂᒃ ᐃᓘᓐᓇᑎᒃ ᐊᕗᖓᓕᒫᖅ ᓱᕐᕃᓂᖃᕐᓯᒪᒍᓐᓇᑐᑦ ᐃᓅᑉ ᐃᓅᓯᖓᓂᒃ. ᐊᑑᑎᖃᑦᑕᑐᑦ ᐃᓚᖕᖓᓂᕐᒥᒃ ᐊᒥᓱᖕᖑᐸᓪᓕᐊᒪᑕ ᓱᒃᑯᐊᕿᔪᑦ ᐃᒻᒥᓂᐊᕐᓂᓗ ᑕᒪᒃᑯᐊ ᐃᓘᓐᓇᑎᒃ ᐅᖁᒣᑦᑐᑦ. ᐃᓘᓐᓇᑕ ᐱᒍᓐᓇᕕᓕᒫᑎᒍᑦ ᑕᒪᓐᓇ ᐊᕐᓱᕈᓐᓇᑐᐊᓗᒃ ᐊᑑᑎᒐᓱᐊᕐᑕᕗᑦ ᓇᓗᓇᕐᓱᓂᓗ “ᐅᓪᓗᒥᐅᓕᕐᑐᖅ” ᓯᓚᕐᔪᐊᖅ ᒐᓗᐊᕐᑎᓗᒍ ᐃᑉᐱᒍᓱᑦᓯᐊᕆᐊᖃᕐᑐᒍᑦ ᑲᒃᑲᓛᓂᒃ, ᓇᓪᓕᒋᔭᐅᑦᓯᐊᕋᓗᐊᕐᒪᖔᑕ ᓴᐳᑦᔭᐅᓯᒪᑦᓯᐊᕋᓗᐊᕐᒪᖔᑕᓗ ᖃᐅᑕᒫᑦ ᐃᑉᐱᒋᑦᓯᐊᓗᒋᑦ.

ᐃᒻᒥᓂᒃ ᑲᒪᑦᓯᐊᖄᕐᓗᓯ, ᐃᕝᕕᑕᒐ ᐃᑲᔪᕈᓐᓇᕋᕕᑦ ᐱᕈᕐᓭᓂᒃᑯᑦ ᕿᑐᕐᖓᑎᓐᓂᒃ. ᓯᕗᓂᑦᓴᕆᒐᑦᑎᒋ…ᑐᓂᕐᕈᑎᒋᒐᑦᑎᒋ ᓯᓚᕐᔪᐊᒧᑦ.

ᐱᕈᕐᓭᓯᐊᕐᓂᖅ ᓴᐳᑦᔨᓯᒪᓂᕐᓗ ᕿᑎᕐᖓᑎᓐᓂᒃ ᓯᕗᓪᓕᐅᔭᐅᒋᐊᖃᕐᐳᖅ!